[253] EPISTOLA LIII.

IUSTUS LIPSIUS

THEODORO CANTERO Suo

S. D.

Libros quos commodo suo usus est IANUS DOUSA, en, mi CANTERE, remitto. Devinxisti illum & me pariter officio magno. Ipse in fragmentis iis colligendis sedulo perseverat. Putat sibi ad eam rem usui fore praeterea Terentianum & Censorinum de die natali, item Arusianum messum; eos si miseris gratum id nobis, & statim remissurum iri mea id ego spondeo fide. Electorum librum (ita Plinii Senioris exemplo inscripsi) jam misi ad PLANTINUM. Sophocles fratris tui imprimitur, uti e PLANTINI literis cognovi. Novi in re literaria magnopere nihil, nisi STADIUM obiisse Lutetiae, si id scire laboras, & CARIONEM nuperrime in Galliam prefectum. Vale, mi Amicissime CANTERE, & inter nos cum fide amemus. Lugduni Batavorum, Kal. Septembribus MDLXXIX. Uxori tuae suavissimae matronae a me salutem.